NOH LICKLE TWANG! (NOT EVEN A LITTLE ACCENT)

[Nanoose]

This poem by Louise Bennett it is about a Jamaican that returns from the United States without a trace of having been.

Me glad fe se's you come back bwoy,
But lawd yuh let me dung,
Me shame o' yuh soh till all o'
Me proudness drop a grung.

Yuh mean yuh goh dah 'Merica
An spen six whole mont' deh,
An come back not a piece betta
Dan how yuh did goh wey?

Bwoy yuh noh shame? Is soh you come?
Afta yuh tan soh lang!
Not even lickle language bwoy?
Not even little twang?

An yuh sista wat work ongle
One week wid 'Merican
She talk so nice now dat we have
De jooce fe undastan?

Bwoy yuh couldn' improve yuhself!
An yuh get soh much pay?
Yuh spen six mont' a foreign, an
Come back ugly same way?

Not even a drapes trouziz? or
A pass de rydim coat?
Bwoy not even a gole teet or
A gole chain roun yuh t'roat.

Suppose me las' rne pass go introjooce
Yuh to a stranga

[Nanoose]

I like this poetry by Louise Bennett here is another one of her poems

.
Colonization in Reverse
What a joyful news, Miss Mattie;
Ah feel like me heart gwine burs -
Jamaica people colonizin
Englan in reverse.
By de hundred, by de tousan,
From country an from town,
By de ship-load, by de plane-load,
Jamaica is Englan boun.
Dem pour out a Jamaica;
Everybody future plan
Is fi get a big-time job
An settle in de motherlan.
What a islan! What a people!
Man an woman, ole an young
Jussa pack dem bag an baggage
An tun history upside dung!
Some people doan like travel,
But fi show dem loyalty
Dem all a open up cheap-fare-
To-Englan agency;
An week by week dem shippin off
Dem countryman like fire
Fi immigrate an populate
De seat a de Empire.
Oonoo se how life is funny,
Oonoo see de tunabout?
Jamaica live fi box bread
Out a English people mout.
For when dem catch a Englan
An start play dem different role
Some will settle down to work
An some will settle fi de dole.
Jane seh de dole is not too bad
Because dey payin she
Two pounds a week fi seek a job
Dat suit her dignity.
Me seh Jane will never fine work
At de rate how she dah look
For all day she stay pon Aunt Fan couch
An read love-story book.
What a devilment a Englan!
Dem face war an brave de worse;
But ah wonderin how dem gwine stan
Colonizin in reverse.